राहतमा फेवाको जलकुम्भी फाल्ने काम

राहातमा जलकुम्भी फाल्ने काम

कृष्णमणि बराल

पोखरा : पोखरा महानगरपालिकाले फेवातालमा माछा मारेर गुजारा चलाउँदै आएका जलारी समुदायलाई राहात स्वरुप फेवातालको जलकुम्भी झार झिक्ने काम दिएको छ । लकडाउनको कारण माछाले बजार नपाएपछि महानगरपालिकाले राहात स्वरुप काम दिएको हो ।

वैशाख १८ गतेदेखि जलारी समुदायले फेवातालको सिमसार क्षेत्रमा फैलिएको जलकुम्भी झार झिक्न थालेका छन् । माछा मारेरै गुजारा चलाउने जलारी समुदाय करिब एक महिना माछा बिक्री गर्न नपाएपछि यसअघि पोखरा महानगरपालिका वडा नम्बर १८ का वडा अध्यक्ष रणबहादुर थापा र जलारी समुदायकै अग्रजसहितको छलफल र सल्लाहामा राहात आवश्यक परेका ५५ घर परिवारलाई चामल, दाल, नुन, तेल लगायतका अत्यावश्यक खाद्यान्न वितरण गरिएको थियो ।

स्थानीय गोमा थापाको पहलमा बेल्जियमबाट आएको सहयोगबाट २५ बोरा चामल जलारी समुदायलाई वितरण गरिएको उनले सुनाए ।
सधैं राहत दिनभन्दा पनि काम दिन जलारी समुदायको पनि माग रहेकेले पहिलो चरणमा २ लाख ६२ हजार रुपैयाँ महानगरपालिकाले जलकुम्भी झार झिक्न छुट्याएर काम सुरु भएको पोखरा १८ का वडा अध्यक्ष थापाले जानकारी दिए । पहिलो चरणमा ७ सय ५० जनाले रोजगारी पाउने उनले बताए । वर्षा याममा तालको सतह बढेपछि तालको सिरानको सिमसार क्षेत्रमा फैलिएको जलकुम्भी झार तालभर फैलन्छ ।

कोरोना सक्रमण नियन्त्रण गर्न सरकारले चैत ११ गतेदेखि लकडाउन लगाएको छ । सामान्य अवस्थामा प्रति दिन २ सय किलो सम्म माछा मारेर बिक्री हुनेमा लकडाउनमा माछा नै बिक्री नभएको फेवा मत्स सहकारीका अध्यक्ष इन्द्र जलारीले बताए । ‘राहत होइन माछाको बजार ब्यवस्थापनमा सघाउन माग गरेका थियौं’, उनले भने । महानगरपालिकाले यस्तो अवस्थामा जलुकम्भी झार झिक्ने काम दिएकोमा उनले खुसी व्यक्त गरे ।